Huhu malu‘i ki he tale lōloá (pertussis) Whooping cough (pertussis) vaccine

‘Oku fakatupunga ‘e he tale lōloá (pertussis) ha ngaahi palopalema ki he mānavá mo e ngaahi tale lahi fakatu‘utāmaki. ‘E lava ke hokohoko atu ‘a e talé ‘i ha ngaahi uike pe māhina ko e ‘uhinga ia ‘oku fa‘a ui ai ‘i he taimi ‘e ni‘ihi ko e ‘tale ‘aho ‘e 100‘.

‘E lava ke iku atu ia ki he niumōnia, hamu, mo e ngaahi palopalema kehe ki he ‘utó. ‘Oku laka hake ‘i he vaeua ‘o e fanga ki‘i pēpē si‘isi‘i hifo ‘i he māhina 12 ‘oku nau ma‘u ia ‘o fiema‘u ai ke ‘ave kinautolu ki falemahaki, pea ‘oku a‘u ki he toko 1 ‘i he toko 50 ‘o e fanga ki‘i pēpē ko ‘ení ‘oku nau mate.

‘E lava ke mafola-ngofua ia ki he ngaahi mēmipa ‘o e fāmilí ‘aki ‘a e tale mo e mafatuá. ‘E toe lava foki ‘o mafola-ngofua ia ‘i he ngaahi ako‘anga tokamu‘á mo e ngaahi ‘apiakó.

‘Oku ‘ikai ke lava ‘o mapule‘i ‘a e tale lōloá ‘i Aotearoa Nu‘u Sila. ‘I he taimi ‘oku tō ai ha to‘u mahaki, ‘okú ne uesia ‘a e kakai ‘e lau afe.
‘Ilo lahi ange fekau‘aki mo e ngaahi faka‘ilongá, ngaahi tupu‘angá mo e faito‘ó.

Tale lōloá (whooping cough) (internal link)

‘Oku fiema‘u ke ke ma‘u ha ngaahi huhu malu‘i ki he tale lōloá lahi hake ‘i he tu‘o tahá ke malu‘i ai koe lolotonga ho‘o mo‘uí.

‘Oku ta‘etotongi ‘a e huhu malu‘i ki he tale lōloá ma‘á e kakai feitamá, fānau kotoa ‘oku si‘isi‘i hifo ‘i he ta‘u 18 mo e kakai lalahi meí he ta‘u 45 mo e 65.

Lolotonga ‘a e feitama kotoa pē

‘Oku kamata hono malu‘i ho‘o fānaú meí he tale lōloá lolotonga ‘a e feitamá.

‘Oku tautautefito ‘a e fakatu‘utāmaki ‘a e tale lōloá ki he fanga ki‘i pēpeé — tautautefito ki he fa‘ahinga ‘oku te‘eki ai ke huhu malu‘í. ‘Oku laka hake ‘i he vaeua ‘o e fanga ki‘i pēpē si‘isi‘i hifo ‘i he māhina 12 ‘oku nau mo‘ua ‘i he tale lōloá pea ‘oku fiema‘u ke ‘ave kinautolu ki falemahaki, pea ‘oku a‘u ki he toko 1 ‘i he toko 50 ‘o e fanga ki‘i pēpē ko ‘ení ‘oku nau mate.

‘I hono ma‘u ‘a e huhu malu‘í ‘i ho‘o feitamá, te ke malu‘i ai ho‘o ki‘i pēpeé kae‘oua kuo nau ma‘u ‘enau fuofua huhu malu‘í ‘i he taimi ‘oku nau uike 6 aí. Ko hono ‘uhingá ‘oku paasi atu ho‘o ivi malu‘í ki ho‘o ki‘i pēpeé fakafou ‘i he fonuá (placenta).

‘Oku ngāue lelei taha iá ‘i he taimi ‘oku fakahoko ai meí he uike 16 ki he 26 ‘o e feitamá, ka ‘oku ‘atā atu ia ‘o ta‘etotongi meí he uike ‘e 13 ‘o e feitama kotoa pē.

Feitamá mo e ngaahi huhu malu‘í (internal link)

‘I he tupu hake ke matu‘otu‘a ange ‘a e fanga ki‘i pēpeé, ‘e ‘alu ke vaivai ange ‘a e ivi malu‘i na‘e paasi meí he fonuá (placenta) ko ia ai ‘e fiema‘u kenau ma‘u ha ivi malu‘i pē ‘iate kinautolu meí he tale lōloá ‘i he vave taha ‘e ala lavá.

‘I he taimi ‘oku uike 6 ai ho‘o ki‘i pēpeé ‘oku totonu kenau ma‘u atu ‘a e tu‘oni huhu ‘uluaki ‘o ‘enau tu‘oni huhu ‘e 3 ‘o e huhu malu‘i ki he tale lōloá.

‘I he māhina 3, ‘e fiema‘u ke fakahoko ‘a e tu‘oni huhu hono ua ‘o e huhu malu‘i ki he tale lōloá.

‘I he māhina 5, ‘e fiema‘u ke fakahoko ‘a e tu‘oni huhu hono tolu ‘o e huhu malu‘i ki he tale lōloá.

‘Oku ‘alu ke vaivai ‘a e ivi malu‘i ki he tale lōloá ‘i he ‘alu ‘a e taimí, ko ia ai ‘oku mahu‘inga ke ma‘u ‘e he fānaú ha huhu fakalahi ‘i he hokosia honau ta‘u 4 – ki mu‘a kenau hū ‘o akó.

‘Oku fokotu‘u atu ke ma‘u ha huhu fakalahi ‘e taha meí he ta‘u 11 ke tokoni ke malu meí he tale lōloá.
‘Oku ma‘u atu ia ‘i he ngaahi ‘apiako ‘e ni‘ihi ma‘á e fānau ‘i he Ta‘u Fakaako 7 pea ‘oku toe ma‘u ta‘etotongi atu foki ia meí ho‘o toketaá, neesí, pe kautaha tokoni ki he mo‘ui leleí.

‘Oku fokotu‘u atu ki he kakai lalahi pau ke fakahoko hanau huhu fakalahi ki he tale lōloá ‘o ‘ikai toe si‘isi‘i hifo ‘i he ta‘u ‘e 10 kotoa pē. ‘Oku kau ki heni ‘a e kakai ‘oku nau:

• ngāue mo e fānau iiki mo e kakai tu‘u laveangofua
• nofo mo ha pēpē toki fā‘ele‘i
• tu‘u laveangofua ke puke lahi meí he tale lōloá, hangē ko e fa‘ahinga ‘oku nau mo‘ua ‘i he mahaki ‘okú ne uesia ‘a e halanga mānavá.

‘Oku ‘oatu ta‘etotongi ‘a e huhu malu‘i ki he tetanus, diphtheria, mo e tale lōloá (Boostrix):

• meí he uike hono 13 ‘o e feitama kotoa pē — fakakaukau leva ke puka ha huhu malu‘i Boostrix ‘i he vaha‘a ‘o e uike 16 mo e 26 ‘o e feitamá koe‘uhi ko e taimi ‘eni ‘oku ngāue ola lelei taha ai ‘a e huhu malu‘í
• ki he kakai ‘e ni‘ihi ‘oku ta‘u 45
• ki he tokotaha kotoa ‘oku lahi hake ‘i he ta‘u 65 — kapau kuó ke ‘osi ma‘u ha huhu malu‘i ta‘etotongi ki he tetanus mo e diphtheria meí he ta‘u 65, ‘e ‘ikai ke ke ‘atā atu ki ha huhu malu‘i ta‘etotongi Boostrix.

Kapau ‘oku ‘ikai ke ke ‘atā atu ke ma‘u ta‘etotongi ‘a e huhu fakalahi ki he tale lōloá, ‘e lava pē ‘o fakatau. ‘E lava ke ‘oatu ‘e he tokotaha ‘okú ne fakahoko ho‘o huhu malu‘í ha fale‘i fekau‘aki mo e lahi ‘o e taimi ‘oku fokotu‘u atu ke ke ma‘u ai ha huhu fakalahi.

‘E $40 ki he $90 ‘a e totongi ki aí ‘o makatu‘unga ‘i he feitu‘u te ke puka aí.

‘Oku ma‘u atu ‘a e malu‘i ki he tale lōloá meí he ngaahi huhu malu‘i ‘okú ne toe ‘oatu ‘a e malu‘i ki he ngaahi mahaki kehé. 

• ‘Oku ‘oatu ki he fanga ki‘i pēpeé ‘a e huhu malu‘i ki he diphtheria, tetanus, tale lōloá, polio, hep B, mo e hib.
• ‘Oku ‘oatu ki he fānau ta‘u 4 ‘a e huhu malu‘i ki he diphtheria, tetanus, tale lōloá, polio, hep B, mo e hib.
• ‘Oku ‘oatu ki he tokotaha kotoa ‘oku ta‘u 11 pe lahi hake ai ‘a e huhu malu‘i ki he tetanus, diphtheria, mo e tale lōloá (Boostrix).

‘Oku ‘ikai ke malava ia ke fakamavahe‘i ‘eni — ‘e ‘ikai lava ia ke ke ma‘u pē ha huhu malu‘i ki he tale lōloá.

Ngaahi uesia tamakí mo e ngaahi ongo‘í

‘Oku lisi atu ‘a e ngaahi uesia tamakí mo e ngaahi ongo‘í ‘i he‘enau ngaahi peesí.

• Huhu malu‘i ki he diphtheria, tetanus, tale lōloá, polio, hep B, mo e Hib (internal link)
• Huhu malu‘i ki he diphtheria, tetanus, tale lōloá, mo e polió (internal link)
• Huhu malu‘i ki he tetanus, diphtheria, tale lōloá (Boostrix) (internal link)

‘Oku ta‘etotongi ‘a e huhu malu‘i ki he tale lōloá ma‘á e kakai feitamá, fānau kotoa ‘oku si‘isi‘i hifo ‘i he ta‘u 18 mo e kakai lalahi meí he ta‘u 45 mo e 65.

Kapau ‘e fiema‘u ke ke totongi, ‘e $40 ki he $90 ‘a e totongi ki aí ‘o makatu‘unga ‘i he feitu‘u te ke puka aí.

Ki he fa‘ahinga ‘oku ta‘u 13 pe lahi hake aí

‘E lava ke puka ‘i he ‘initanetí pe fakafou ‘i he telefoní ‘a e ngaahi huhu malu‘i ki he fa‘ahinga taautahá pe ngaahi kulupu ‘oku ta‘u 13 pe lahi hake aí.

• Puka ‘i he ‘initanetí: Book my vaccine (external link)
• Puka fakafou ‘i he telefoní: 0800 28 29 26 (8 pongipongi ki he 5 efiafi, Mōnite ki he Falaite).

Ki he fa‘ahinga ta‘u 12 pe si‘isi‘i hifo aí

Puka fakahangatonu ki ho‘o toketaá, neesí, pe kautaha tokoni ki he mo‘ui leleí kapau ‘okú ke puka ha fānau ‘oku si‘isi‘i hifo ‘i he ta‘u 13.

Te ke lava ‘o fekumi ‘i he uepisaiti ‘a e Healthpoint ke ‘ilo ki he feitu‘u ‘oku fakahoko ai ‘a e ngaahi huhu malu‘i Boostrix pea kumi ha ngaahi fakaikiiki ki he fetu‘utakí ke ‘ilo pe ‘oku fiha ‘enau totongí.

Kumi ki ha ngaahi feitu‘u ofi atu kiate koe ‘oku fakahoko ai ‘a e huhu malu‘i Boostrix — Healthpoint (external link)

Kapau ‘oku ‘ikai ke ‘i ai ha‘o toketā, ‘oku ‘i ai ha lisi mo ha mape ‘i he uepisaiti Healthpoint ki he ngaahi feitu‘u ‘oku lava ke ‘alu ki ai ha fa‘ahinga taha pē. ‘Oku kau ki heni ‘a e ngaahi fale talavai mo e kau toketā ‘oku nau tokoni ki he kau mahaki ‘oku ‘ikai ke lēsisitá.

• Ngaahi feitu‘u fai‘anga huhu malu‘i ‘oku ‘atā atu ki ha fa‘ahinga taha pē — Healthpoint (external link)
• Ngaahi feitu‘u fai‘anga huhu malu‘i ma‘á e longa‘i fānaú ‘oku ‘atā atu ki ha fa‘ahinga taha pē — Healthpoint (external link)

Kapau na‘e ‘ikai ke fakahoko ha‘o huhu malu‘i ‘i hono taimi totonú ‘oku sai pē ia. Te ke lava pē ‘o fakakakato ‘a e lahi taha ‘o e ngaahi huhu malu‘i kehé.

Ke ma‘u ha fale‘i, talanoa ki ho‘o toketaá, neesí, pe tokotaha palofesinale falala‘anga ki he mo‘ui leleí.

Ko hono fakakakato ‘a e ngaahi huhu malu‘i na‘e te‘eki ai ke fakahoko (internal link)