Founga ‘o ‘emau tokanga‘i mo ngāue‘aki ‘a e fakamatala ki ho‘o mo‘ui leleí How we manage and use your health information
‘Oku kau ‘a e Auckland Regional Public Health Service (Sēvesi Fakavahe ‘a ‘Okalani ki he Malu‘i ‘o e Mo‘ui Lelei ‘a e Kakaí pe ARPHS) ‘i hono ta‘ota‘ofi mo fakasi‘isi‘i ‘a e mafola ‘a e ngaahi mahaki pipihí. ‘E lava ke kau ki heni hano fakahoko ‘o ha ngaahi faka‘eke‘eke ‘o e ngaahi keisí (kakai ‘oku nau ma‘u pe ‘oku nau ngali ma‘u ‘a e mahakí) pea mo kinautolu na‘a nau felāve‘i mo e mahakí (kakai ‘oku nau tu‘u lavea ngofua ke ma‘u ‘a e mahaki pipihí meí ha keisi), pe ma‘u mai pe tauhi ha fakamatala ki he mo‘ui leleí meí ha ngaahi ma‘u‘anga fakamatala kehe.
This content is available in other languages:
‘Oku tauhi malu ‘a ho ngaahi fakamatalá ‘i he malumalu ‘o e Health Information Privacy Code (Tu‘utu‘uni Fakalao ki he Tauhi Malu ‘o e Fakamatalá) mo ha ngaahi lao kehe.
Ko e fakamatala ‘oku tānaki ‘i he lolotonga ‘o e ngaahi faka‘eke‘eké, pe ‘i ha ngaahi founga kehe, ‘e ngāue‘aki pē ia ke tokoni ki hono ta‘ota‘ofi ‘a e mafola ‘a ha ngaahi mahaki pipihi pea mo tauhi ‘a e ni‘ihi kehé ke nau malu ai.
Ko e fakamatala ‘oku tānakí ‘e tauhi ia ‘e he ARPHS pea mo e National Public Health Service (Sēvesi Fakafonua ki he Malu‘i ‘o e Mo‘ui Lelei ‘a e Kakaí), ‘a ia ko ha ongo konga kinaua ‘o e Health New Zealand - Te Whatu Ora.
‘E ala fiema‘u ‘e he ARPHS ke vahevahe atu ha fakamatala na‘e tānaki, mo ha ni‘ihi kehe ‘oku nau kau ‘i hono mapule‘i ‘o e ngaahi mahaki pipihí, hangē ko ho‘o toketaá pe ngaahi sēvesi kehe ki he mo‘ui leleí. Te mau toki vahevahe atu pē ‘a e fakamatala ko ‘ení ki he taumu‘a ko hono mapule‘i ‘o e mahakí.
‘E ‘i ai ha ngaahi fakamatala ‘e ala fakahā atu ia ki he kakaí, hangē ko ha ngaahi feitu‘u pea mo ha ngaahi kātoanga na‘á ke ‘i ai. ‘Oku fakahoko ‘eni ke tokoni ki hono kumi ‘o e kakai na‘e ngalingali na‘a mou vā ofí. ‘E ‘ikai fakahā atu ki tu‘a ‘a e ngaahi fakamatala fakafo‘ituitui ia kau kiate koé.
‘E lava ke ke sio ki he fakamatala ki ho‘o mo‘ui leleí kapau ‘okú ke fie fakahoko ia, pea ‘e lava ke ke kole ke fakatonutonu ia kapau ‘okú ke pehē ‘oku fehalaaki pe takihala ia.
‘E lava ke ‘oatu ha ngaahi me‘a ‘okú ke hoha‘a ki ai fekau‘aki mo e tauhi malu ‘o e fakamatala ki ho‘o mo‘ui leleí ki he District Privacy Officer (‘Ōfisa Fakavahe ki he Tauhi Malu ‘o e Fakamatala) ki he mo‘ui leleí ‘oku kaunga atú pe ki he Office of the Privacy Commissioner (‘Ōfisi ‘o e Komisiona ki he Tauhi Malu ‘o e Fakamatalá).
Ko e fakamatala ‘oku mau kole meiate koé ‘oku mahu‘inga ia ki hono mapule‘i ‘o e mafola ‘o e ngaahi mahaki pipihí. Kapau ‘e ‘ikai te ke ‘omai ‘a e fakamatala ko iá, ‘e malava ke toe faingata‘a ange ‘a hono mapule‘i ‘o e ngaahi mahakí ni. ‘I he taimi ‘e ni‘ihi, te mau fiema‘u atu ke ke ‘omai ha fakamatala kiate kimautolu ‘i he malumalu ‘o e Health Act (Lao ki he Mo‘ui Leleí).