Arero tāhere Tongue tie

He āhua 5 ki te 10% ngā pēpi ka whānau ake me te arero tāhere, engari he haurua o ēnei pēpi e pai noa iho ana te whāngote.

Ko te tikanga o tērā, āhua 2 ki te 5% ngā pēpi arero tāhere, ka hua pea he raruraru whāngote, inu pātara rānei.

Ko te nuinga o ngā pēpi whānau me te arero tāhere, kāore:

• he raruraru whāngote
• e hiahia rongoā.

Engari mō ētahi pēpi, nā te arero tāhere, kua kore e kaha te neke i te arero ki te kai tika. Ka uaua pea hoki ki ēnei pēpi te hono, te noho hono rānei ki te ū. Ko ngā pēpi arero tāhere toimaha, ka uaua pea te whāngai mā te pātara.

He uaua hoki ki ētahi pēpi te hono tika, i muri tata o te whānautanga, ahakoa kāore i tāherea te arero. Ka āhua roa mō te whaea me te pēpi ki te whakamāui ake i te whānautanga, me te ako ki te whāngote. Kia ora rawa, kua kore haere ēnei raruraru i te nuinga o te wā.

Mehemea he uaua te hono a tō pēpi, te noho hono rānei nā te arero tāhere, ka kite pea koe i ētahi o ēnei tohu.

Mō te whaea whakawhānau

• He mamae te whāngote i te roanga katoa o te wā whāngai.
• Ka mamae pea ō titi, ka kōputaputa, ka raupā, ka toto, ka marū rānei.
• Kāore e nui tō waiū ki te whāngai i tō pēpi nā te huringa o āna hiahia.

Mō tō pēpi

• Ka uaua pea ki a ia te hono, te noho hono rānei mō te roanga o te wā whāngai.
• Ka kārangirangi pea, he wahakawa rānei i te wā kai, hei tauira, ka timotimo noa iho pea i te ū.
• Ka rongo i te ngetengete, i te ngotengote rānei i te wā e kai ana.
• Ka kite pea koe, kua kore e kaha te whakamau kope hou nā te iti o te mimi me te tiko.
• Ka āta piki noa iho te taumaha, kāore rānei e piki, otirā tērā pea ka heke.

He poto rawa, he roa rawa rānei te wā kai a tō pēpi, ā, kāore i ngata, ahakoa neke atu i te 8 ngā wā whāngote i ia 24 haora.
Ko ngā tohu katoa ka hua ake pea nā ētahi atu āhuatanga. He mea nui kia whakahaeretia he aromatawai whāngote, ki te tiro he aha te raru.

Mēnā kei te māharahara koe mō te āhua o te whāngote a tō pēpi, tērā pea he arero tāhere tōna, tēnā tonoa tētahi aromatawai whāngote.

Ka taea e tō kaiwhakawhānau, e tō Kaitiaki Whakawhānau Matua (LMC) rānei te tono i a koe ki tētahi mātanga whāngote kia aromatawaihia koe.

Te aromatawai

I te wā o te aromatawai, ka kōrero atu te mātanga whāngote ki a koe mō ngā mahi whāngote a tō pēpi. Ka mātaki rātou i tō pēpi e whāngote ana, me te whakatikatika i tō tikanga whāngote mēnā e tika ana. Ka titiro hoki ia ki te āhua o te neke o te arero o tō pēpi, ā, me te hono o te frenulum.

Ka whakamahi te mātanga whāngote i tētahi taputapu piro māmā ki te whakatau i te nui o te arero tāhere, ā, mehemea me haumanu, kāore rānei. Ka taea te aromatawai i tō pēpi i te 2 rā i muri i tana whānautanga mai, mēnā he taumaha ngā raru whāngote. Engari he pai tonu te tatari mō te wiki, kia whanake ai ngā tauira whāngai noa.

Mēnā ka tohu ake tō aromatawai whāngote kei te hua ake he raruraru i te arero tāhere, ka taea te wewete i te arero tāhere o pēpi, (karangatia ai he kotinga arero tāhere, he wāhinga frenulum, he frenotomy rānei). Ka ngāwari ake pea te whāngote. Kāore he taunakitanga o te wā nei e tohu ana i te whakakorenga o ngā raruraru ā-reo, ā-niho rānei i te wetenga o te arero tāhere o ngā pēpi hou.

Ka taea e tō mātanga whāngote, kaiwhakawhānau rānei te tohu i tō pēpi ki tētahi mātanga hauora kua whakangungua ki te wete i te arero tāhere. Ka taea te whiwhi mā te pūnaha hauora tūmatanui, ka taea rānei te utu kia māhia ā-tūmataititia.

Ko ngā mātanga hauora ka mahi i te frenotomy:

• he kaiwhakawhānau kua rēhitatia (he mātanga whāngote pea hoki)
• he rata arowhānui (GP)
• he rata hauora tamariki
• he rata niho, mātanga niho rānei.

Kōrero ki tō mātanga whāngote, Kaitiaki Whakawhānau Matua rānei mō te mea e hāngai ana ki a koe.

Te wete i te arero tāhere

He tikanga tere, māmā hoki te wete i arero tāhere. Ko te tikanga kua whiwhi kē tō pēpi i te huaora K i mua. Mēnā kāore i whiwhi huaora K, e kore e mahia te wetenga.

Kāore te nuinga o ngā pēpi e whakararuhia, engari ka pāmamae pea i te mea ka tākaihia, ā, ka āta puritia. Ka haumaru te tākaihia o tō pēpi, ā, ka āta puritia hoki kia kore e oreore i te wā e mahia ana. Ka hoatu pea he paku waiū, he hūhuka rānei, hei whakaiti i te mamae.

Ka hīkina te arero o tō pēpi e te mātanga hauora e whakahaere ana i te wetenga arero tāhere, ā, ka kutia tana frenulum ki te kutikuti mā. Ko te tikanga kāore e tino rere te toto.

I muri tata i te wetenga, ka ākina koe ki te whāngai i tō pēpi. Ka whakaatuhia pea ki a koe ētahi tikanga ki te huri i te āhua o te whāngote.

Ko te nuinga o ngā pēpi, ka wetekina te arero tāhere i mua o te 2 marama te pakeke. Mēnā he pakeke ake tō pēpi, he takawhīwhiwhi ake rānei te arero tāhere, ka whakamahia pea he rongoā whakarehu ahuwhānui e te rata poka.

He aha ngā tūponotanga i muri o te wetenga

Ka tere kite ētahi mātua i te rerekētanga i muri tonu iho i te wetenga, ā, ka roa pea ki ētahi atu ki te ako ki te whāngote anō i te mea kua pīngore ake te arero o te pēpi. Ko ētahi mātua e kī ana kāore noa i rerekē ake.

Mēnā he pakeke ake tō pēpi i te 2 marama, ka āhua rua rā, ki te rua wiki pea i mua o te kite i ngā hua katoa.

Ki te pērā tonu ngā uauatanga o te whāngai, tērā pea arā atu ngā raruraru e pā ana ki te tikanga whāngai a tō pēpi. Me aromatawai anō pea i tō pēpi. Ka whaiwhaihia tēnei e tō kaiwhakawhānau, rata, nēhi, nēhi Tamariki Ora rānei ki te tiro kei te pēhea koe, ā, mēnā kei te raruraru tonu koe. Mā rātou e whakarongoā i ngā raruraru.